Brief eines Allgäuer Bundeswehrrekruten an Zuhause:
Liaba Mama, Liaber Papa,
mir gots guat, i hoff uib o. Sesch am Karl, Franz, Sepp, Willi, Peter und am Hans an Gruass, beim Bund isch's wunderbar, schlägt jeda Landarbeit um Längen! Sie sollet sie no schnell verpflichta, vor alle Plätz voll send.
Zerscht war i ganz uruhig, weil ma bis 6e im Bett bleiba muass, aber langsam gfällt mir des mit deam langa Ausschlofa. Ma muass bloß sei Bett richta und a baar Sacha vorm Frühschtück poliera. Koi Holz hacka, koi Fuir mocha, koina Viechar fuattra und koin Stall mocha.
S Frühschtück isch zwar ganz komisch, mit ganz am Haufa Saft, Körner und Getreide - it mit normala Sacha wie Fleisch, Kässpatza und Greichrats - aber wenn ma neba solcha Städler hockt, dia blossig an Kaffee trinkat und ma vo deana s Zuig mitisst, dann hebts scho bis Mittag.
Do wundrats mit it, dass dia Städtler it lang loffa kennad.
Mir gand viel auf Überlandmärsch, vo deana da Hauptfeld behauptet, des sei guat für d Abhärtung. Wenn a moint ...
A Überlandmarsch isch ugfähr so weit wia vo Eis bis zum Postamt na, aber alls ganz flach, wenn mer dann do send, hand all Städtler hiniga Fiass, dass ma se mit'm Laschter zrugfahra muass.
Dia Laschter send fei besser gfedret wia eiser 24er Fendt.
Sesch m Franz und m Karl, dass i sogar scho Auszeichnunga fiars Schiassa kriagt hob, und i woiß garit warum. 'S Schwarza isch viel greasser als a Rattakopf und beweget si it amol. Und zrugschiassa wia d Gamshofer Buaba mit'm Luftgwehr deand se o it.
Alls was d mocha muasch, isch di bequem noflacka und d Patrona muasch o it sell mocha, die hand se fertig in Kischta.
Dann gibt's no dia Nahkampfaussbildung. Do ko ma gega d Städtler ringa.
Aber do muass ma ganz hofala dau und Obacht gea, weil dia ganz leicht kaputt gand.
Isch leichter als da Molla bändiga. Bloß gega da Hintermoaslstoiner Sepp hob i erscht oimol gwonna, aber des liegt halt dro, dass a mit seina 2 Metter über 120 kilo wiegt.
Scheana Griass ins Allgai,
uiber Fehl Maria