hallole marianne,
ich hab hier noch was für nen vorstandsvorsitzenden vom gesangverein,
Wenn Vorstand bischt
Wenn Vorstand bischt vom G'sangverei
no bischt scho g'schafft, des sag' dr fei!
Mit ällem muascht de doch romschlage
z'letschte schägt's dr auf de Mage.
Was kommt bloß älles de zua?
Vorbei isch es dann mit Deiner Ruah!
Ond wenn de möchscht amol verschnaufe,
kommt oiner doch ganz g'wiß aglaufa!
wenn d' Vorstand bisch vom G'sangverei!
An älles sollste selber denka,
Älles em Kopf hau, älles lenka.
Ond goht drbei oimol was schief,
wenn sonscht au älles richtig lief,
no brengt Dir des Kritik bloß ei,
wenn Vorstand bischt vom G'sangverei!
Plane kannst bloß no, organisiere
ond drüber net da Kopf verliera.
Do send die viele, viele Feschtla,
was muascht do älles zemabäschtle?
Was für G'schäft des älles mit sich brengt,
des ischt net so oifach, wia mr denkt!
Ond älles machscht so nebabei,
wenn Vorstand bischt vom G'sangverei!
A neue Satzong stoht scho längstens an,
wer verfaßt dui bloß, macht sich do ran?
Man sollt se zeitgemäß gestalta 's
isch oifach nex meh mit dr alte!
Des Problem Dir auf de Nägel brennt,
was brengt des bloß für Widerständ?
Wenn's au schwer fällt, 's muaß halt sei,
worom bischt au Vorstand von dem G'sangverei?
Zua de Gauversammlonga sollschte ganga,
höhrere Beiträg sollschte net verlanga,
's Vereinsvermöga aber trotzdem mehra,
au verdiente Sänger sollt mr ehra.
Vergißt bloß oin, was ischt dann los?
Die Enttäuschung (von dem Oine) ischt dann groß!
Ja manchmol hoscht es wirklich schwer,
au dr Dirigent möcht' sei Salär!
Trotzdem soll d' Kasse stets en Ordnung sei,
wenn de Vorstand bischt vom G'sangverei!
Mit 'em Ausschuß solltscht au wieder taga,
viel Probleme gibt's ond meh Fraga,
die zom Beispiel 's gar mancherlei,
wenn Vorstand bischt vom G'sangverei!
Willscht a Feschtle macha, 's wär so weit,
für de Arbeitsdienscht, wer hot do Zeit?
Glaub bloß net, do fahret d' Händ en d' Höh,
wia sieht des aus, Herr Jemineh!
Do kennscht wieder älles selber macha,
zom Heula isch des, net zom Lacha!
Wia schaff i des bloß wieder, denk' sch drbei,
Wenn Vorstand bisch vom G'sangverei!
Beim Überlega fiel mir noch manches ei,
zom Vorstand ond ons'rem G'sangverei!
Doch sag i mir, sei auf dr Huat,
laß ruha dui Sach, sei so guat!
Wenn's druf akommt, no send se do,
reißet sich zemma, stellet de Ma!
Drom kann es auch so schlemm net sei,
Wenn de Vorstand bischt vom G'sangverei!
Drom komm i langsam jetzt zom End,
ond hoff, daß i 's rechte Schlußwort fend!
Em a G'sangverein hot's gar viele Leut,
wia 's dia halt überall so geit!
Was älles g'schwätzt wird gib nix drauf,
wenn se gnuag g'schwätzt hend, hör'n se auf!
Nerve schon, mit 'ma dicka Fell,
kommscht drüber weg, oft meistens schnell.
Geh' Deinen Weg, sei emmer heiter,
mit der Eistellung kommschte meistens weiter!
Des soll mei Ratschlag für Dich sei,
solang Vorstand bischt vom G'sangverei!
Für Erich Roos zum Sechzigsten
von seinem Vize (Frohsinn Hochdorf)